den 24 januari 2012 15:23:57
نه‌جمه‌دین شێخ بزێنی
سوید
قه‌یرانی سیاسیه، یان سه‌رلێشێواوی و به‌ره‌ڵایه‌تیه؟!.
پرۆسه‌ی دیمکراسیه‌ت، پرۆسه‌یه‌کی تازه له‌دایک بو نیه له‌ئێراقدا هاتبێته کایه‌وه، ئاشکرایه پرۆسه‌یه‌کی سیاسی زۆر کاریگه‌ره، بۆ چاره‌سه‌رکردنی کێشه‌ی نه‌ته‌وایه‌تی و به‌ڕیوه‌به‌رایه‌تی، به‌تایبه‌تی له ووڵاتانی فره نه‌ته‌وه‌دا، که به‌ ئارامی و یه‌کسانی پێکه‌وه بژین، گومان له وه‌شدا نییه،که ‌به‌ر له مێژووی زاینی، کار له ‌سه‌ر ئه‌م پرۆسه سیاسیه کراوه، که فیدرالیه‌تیش چمکێکی زاده‌ی ئه‌وه‌و، ئێستا له‌ ووڵاتانی پێشکه‌وتودا زۆر به فراوانی کاری پێ ئه‌کرێت و سه‌رکه‌‌وتنی بێ وێنه‌ی هێناوه‌ته کایه‌وه!.
پاش ئه‌وه‌ی کابینه‌ی دوهه‌می حکومه‌ته‌که‌ی به‌غدا، که ‌دوکتۆر ئیبراهیم چه‌عفه‌ری سه‌رۆک وه‌زیرانی بوو، دوچاڕی له‌رزۆکی و گه‌نده‌ڵی و سه‌ره‌ڕۆیی بوو، لایه‌نه سیاسیه‌کان که‌وتنه خه‌‌م خۆری ده‌سه‌ڵات و بڕیاری هه‌ڵبژاردنی سه‌را‌نسه‌ری ئێراقیان ده‌رکرد، به‌ڵکو به شێوازێکی دیموکراسیانه‌و سه‌رکه‌وتووانه،حکومه‌تێکی یاسایی لێهاتو و گونجاو پێک بهێنن. به ‌هه‌رحال،له پرۆسه‌ی ئه‌نجامدانی هه‌ڵبژاردنه‌که‌دا سه‌رکه‌وتو بون، به‌ڵام هه‌ر له‌سه‌ره‌تاوه دیارده‌ی ناکۆکی نێوان هه‌ردو لیسته سه‌ره‌کیه‌ عه‌ره‌بیه‌که( العراقیه‌و، هاوپه‌یمانی نیشتمانی) به‌دی کراو، ئاریشه‌ی سیاسی هاته ئاراوه زۆر به‌توندی، تاکو له ‌ئه‌نجامدا، لیستی هاوپه‌یمانی نیشتمانی،به سه‌رۆکایه‌تی نوری مالیکی، سه‌رکه‌وتنی به‌ده‌ست هێناو، وه‌ک سه‌رۆک وه‌زیرانی تازه‌و لێهاتو ده‌ست نیشان کرا.
دیاره گومان له‌وه‌دا نیه، به‌یه‌کلایی بونه‌وه‌ی پۆستی سه‌رۆک وه‌زیران،کێشه‌ی سیاسی نێوان ئه‌ودوو لیسته نه‌ک هه‌ر کۆتایی پێ نه‌هات، به‌ڵکو زۆر زیادیشی کرد. به‌لام، سه‌رۆک وه‌زیران نوری مالیکی، له‌گه‌مه‌یه‌کی سیاسیدا له نێوان هێزه ده‌ره‌کیه‌کانی،که کاریگه‌رییان له‌سه‌ر بارودۆخی سیاسی ئێراق هه‌بو، به‌تایبه‌تیش ئێران و ئه‌مریکا، سه‌رکه‌وتنێ باشی به‌ده‌ست هێنا بۆ خۆی، که به‌خه‌ڵه‌تاندنی ئه‌مرێکا که‌وته‌وه، چونکه گومان له‌وه‌دا نیه، که ‌نوری مالیکی پشتگیری لێ ئه‌کرێت له‌ لایه‌ن ئێرانه‌وه!.
به‌سه‌رکه‌وتنی له‌و یاریه‌دا، ڕیگای هه‌نگاو نانی خێرایی بۆ کرایه‌وه، له‌ دورخستنه‌وه‌ی هێزی ئه‌مریکی و خۆ نزیک خستنه‌وه‌و سود وه‌رگرتن له پشتیوانی لێکردنی، له‌ لایه‌ن ئێرانه‌وه، به پله‌ی یه‌که‌م: بۆ دژایه‌تی کردنی لایه‌نی کوردی و لیستی العراقیه، که به‌دوو به‌رهه‌ڵستکاری سه‌ره‌کی و ڕاسته‌قینه‌ی خۆی ئه‌زانێت، بۆ به‌ده‌ست هێنانی ئه‌و ده‌سه‌ڵاته تاک ڕه‌ویه‌ی که ئاواتی هه‌ره گه‌وره‌یه‌تی، هه‌تا‌کو بتوانێت ده‌سه‌ڵاتێکی ناوه‌ندی به‌هیز بێنێته کایه‌وه‌و، هه‌روه‌ها ئێراق ڕاپێچ بکاته ژێر باڵی، شیعه ‌‌گه‌ریه‌تی کۆماری ئیسلامی ئێرانه‌وه به پله‌ی دوهه‌م، بۆ ئه‌وه‌ی بتوانێ وه‌ک دیکتاتۆرێک، فه‌رمانڕه‌وایه‌تی ئێراق بکات!!.
ئاشکرایه ئه‌نجامدانی ئه‌و ئه‌جیندا سیاسیه،کارێکی ئاسایی ئه‌وتۆ نیه بۆ که‌سێ، نه ‌سه‌نگی که‌سایه‌تی و نه‌سه‌نگی هێز و نه‌سه‌نگی سیاسه‌تمه‌داری و ئه‌زمونداری، له ‌سه‌روی به‌رانبه‌ره‌کانیدا نه‌بێت، ئه‌و له خۆ بایی بونه‌ی نوری مالیکی، ئه‌گونجێ له‌به‌رانبه‌ر ناوه‌وه‌ی حزبه‌که‌ی خۆی(دعوه) له ‌به‌ر چاو بگیرێت، به‌ڵام له‌ به‌رانبه‌ر لایه‌نه سیاسیه‌کانی تری کوردی و عه‌ره‌بی، هیچ بایه‌خێکی بۆ داناندرێت، چونکه به‌ڵگه‌ی ئه‌و ماوه‌یه‌ی تێپه‌ڕی به‌سه‌ر پۆسته‌که‌ی ئێستایدا، به‌ هه‌مو جۆرێ ئه‌یسه‌لمێنێ،که‌سایه‌تیه‌کی فاشیل و نه‌زانه، له به‌ڕیوه به‌رایه‌تی ده‌وڵه‌تدا، بۆیه مه‌حاڵه جارێکی تری، ئه‌و پۆسته‌ی ئێستاشی پێ ڕه‌وا ببینرێت له‌لاین هێزه سیاسیه‌کانی ئێراقی و کوردستانیه‌وه، لێره‌دا ئه‌گونجێ بوترێ: چو بۆ ڕیش، سمێڵیشی له‌سه‌ر دانا!!.
که ‌وتراوه که‌سی گونجاو بۆ شوێنی گونجاو، بۆچونێکی هه‌ڕه‌مه‌کی و خه‌‌یاڵی نه‌بووه، هۆکاری سه‌لمێنه‌ری بۆ دروست بووه، ئه‌مڕۆش گه‌لی ئێراقی به‌گشتی ئه‌توانێ ئه‌و ڕاستیه ببینێ، به‌ به‌راورد کردنی ده‌سه‌ڵات، له نێوانی حکومه‌تی هه‌رێمی کوردستان و حکومه‌تی ناوه‌ندی، که نوری مالیکی ئه‌یبات به‌ڕیوه، له‌گه‌ڵ ئه‌و هه‌مو تووانا ئابورو و ده‌سه‌ڵاته ئیداریه زۆره‌دا،که له ژێر ده‌ستی دایه،له‌ هه‌مان کاتیشدا به هه‌مو جۆرێک هه‌وڵی داوه، به‌رگری له ده‌سه‌ڵات و داهاتی ئابوری حکومه‌تی هه‌رێمی کوردستان بکات، هه‌ر وه‌ک به‌ڵگه‌ی ڕاستیش له ‌به‌ر چاوه، وه‌کو هه‌ڵپه‌ساردنی کێشه‌ی نه‌وت و گاز و بودجه‌و پێشمه‌رگه‌و ماده‌ی:١٤٠‌!!.
ئه‌گه‌ر به وردی سرنج بده‌ین، له‌به‌رانبه‌ر ئه‌و پێشکه‌وتنه ئابوری و کۆمه‌ڵایه‌تی وئارامی و شارستانیه‌ته‌دا، که له‌کوردستان هاتۆته ئاراوه، به هۆی سیاسه‌تی حه‌کیمانه‌ی سه‌رکردایه‌تی کورده‌وه، ئه‌بینین له ئێراقدا، زۆر ڕون و ئاشکرایه، دوبه‌ره‌کی و، ماڵوێرانی و، خوێن ڕشتنی به‌ناڕه‌واو،گه‌نده‌ڵی قێزه‌وه‌ن و،لێک ترازانی، شیرازه‌ی پێکه‌وه ژیانی کۆمه‌ڵایه‌تی و نا ئارامی و هه‌تا‌وه‌کو ئه‌گاته سڕ کردنی ده‌سه‌ڵات به جۆرێک، پادشا گه‌ردانیه‌کی ئاشکرا، له بڕیاردان و سه‌ره ڕۆیی، بگاته ئاستێک، ته‌نانه‌ت، به‌ر‌پرسێکی پله نزم، له‌ ئاستی قائیمقامیه‌تدا، بڕیاری دابڕاندنی حکومه‌تێکی هه‌رێمی بدات، به داخستنی ڕێگای هامڵتۆن!!.
وه‌ک له‌به‌ر چاوه‌و نکۆڵی لێ ناکرێت، ئێستا ڕێبه‌ری هه‌ر کوتله‌یه‌کی سیاسی و مه‌زهه‌بی و خاون هێزێکی چه‌کداری، خۆیان سه‌ر به‌خۆن و مل بۆ هیچ لایه‌نێک دانانه‌وێنن، ته‌نانه‌ت بۆ سه‌رۆک وه‌زیرانیش، هه‌رچی بڕیارێک بدرێ، ئه‌گه‌ر له‌گه‌ڵ هه‌ڵوێست و به‌رژه‌وه‌ندی لایه‌نه‌که‌ی خۆیاندا نه‌گونجێ، پێڕه‌و ناکرێت، هه‌ر بۆ نمونه: ئه‌ندامێک له لیستی ده‌وڵه‌تی قانون، بۆ به‌رپه‌رچ دانه‌وه‌ی هه‌ڵوێستێکی ئه‌یاد عه‌لاوی، که‌داوای گۆڕینی نوری مالیکی ئه‌کات وه‌ک مه‌رجێک له مه‌رجه‌کانی، ئه‌و ئه‌ندامه ئه‌ڵێت: نه‌ک هه‌ر لیستی عراقیه، ئه‌گه‌ر هه‌مو گه‌لی ئێراقیش داوای گۆڕینی نوری مالیکی بکات، ناگۆڕدری و گۆڕینی بۆ نیه!!.
گومان له‌وه‌دا نیه که ڕوشنبیران، به‌ڵکو له منیش باشتر ئاگاداری ئه‌و به‌ره‌ڵاییه(لیبرالیه‌ت) ه ئیداری و سیاسیه‌ی، به‌رۆکی حکومه‌تی ناوه‌ندی ئێراقی فیدرالی گرتۆته‌وه، ڕوبه‌ڕوی سه‌ره‌مه‌رگێکی ئه‌نجام نادیاری کردۆته‌وه، که هه‌موو لایه‌نه سیاسی و کۆمه‌ڵایه‌تی و مه‌زهه‌بیه‌کانی تێدا زه‌ره‌ر مه‌ند ئه‌بێت، بۆیه جێگه‌ی خۆیه‌تی که ئێمه‌ش لێره‌دا بڵێن: ئه‌و بارودۆخه‌ی ئێستا هاتۆته ئاراوه، قه‌یرانی سیاسی نیه،به‌ڵکو جۆرێک له ‌سه‌رلێشێوای و به‌ره‌ڵاییه، به‌هۆی لاوازی و خۆ په‌سه‌ندی سه‌رۆک وه‌زیران، نوری مالیکیه‌وه‌!!!.