حەسەن شیوەسەڵی نرخێك بۆ ئازادی‌، بەڵگەیەك بۆ ریسوایی تیرۆریزمی دەوڵەتی! رەحیم رەشیدی
جووڵانەوە‌ی مافخوازانەی خەڵكی كوردستان، لە ڕەوتی خەباتی سەربەرزانەی خۆیدا بۆ دەستەبەركردنی ئاشتی، ئازادی ‌و دێموكراسی، بەر لە هەر شتێك، پشتی بە كار و نەسرەوتنی ڕۆڵەكانی نەتەوەی كورد بەستووە كە لە هەموو دۆخێكدا بە ورەبەرزی ‌و دەروەستانە باری قورس‌ و گرانی ئەم بزووتنەوەیە بە پشتبەستن بە ئیرادەی شۆڕشگێڕانە بەرەوپێش دەبەن، هیچ تەنگ‌ و چەڵەمەیەك كۆڵیان پێنادات ‌و لە راستەرێگای خەبات بۆ رزگاریی گەلی كورد، هەتڵەیان ناكات.
‌ئاشكرایە، ئەو توێژە لە رۆڵەكانی خە‌ڵكی كورد كە بۆ ئازادی ‌و رزگاری بە پاڵپشتی ‌و هاودڵیی زۆربەی نەتەوەی كورد، لە ریزی بزوتنە‌وەی میللی ـ دێموكراتیكی خەڵكی كورستاندا گیرساونەوە و بە ناوی پێشمەرگە ناویان دێتە گۆڕێ‌، بە ئاوڕدانەوەیەكی كورت لە ژیان ‌و بارودۆخی تێكۆشانیان‌، ئەو ئەركە قورس‌ و مەزنانە كە بۆ خزمەت بە دۆزی ڕەوای گەلەكەیان ‌و پرشكۆتركردنی هەرچی پتری خەبات ‌و كۆڵنەدان وەئەستۆی دەگرن‌، فیداكارانە بەڕێوەی دەبەن ‌و لە پێناو سەربەرزی ‌و سەرفرازی خەڵكی كورد‌دا شێلگیرانە ڕەوتی خەبات بەرەو ئاسۆی هیوادەری سەركەوتن دەبەن، باشترین ‌و فیداكارترین رۆڵەكانی نەتەوەی كوردن، چوونكە تەنیا بیر لە سەربەرزی ‌و رزگاریی وڵات لە دەستی زاڵم ‌و داگیركەر دە‌كە‌نەوە و لەم پێناوەدا هەڵسووڕ و كاران، هەر بۆیە هێندە لای خەڵكی نیشتمانپەروەری كورد خۆشەویست ‌‌‌و جێگای فەخر و رێزن.
ئەم فەخر و رێزە شایانە لە لایەن خەڵكی نیشتمانپەروەری كوردەوە، وەك دیاردەیەكی مەزن ‌و بەرینی مە‌عنەوی، لە بەرانبەر لەخۆبردوویی ‌و گیانفیدایی ئەو خەباتگێرانەدا نیشان دەدرێ كە سەر و ماڵ، ژیان ‌و گیانان بۆ دابینبوونی ژیانێكی شیاوی مرۆڤی سەردەم بۆ خەڵكی كورد تەرخان كردووە و تەرخان دەكەن. ئەم توێژە خەڵكویستە، بێ ماڵ ‌و سامان، بەڵام خاوەنی شانازی‌ و حورمەتی بێ كۆتایین‌.
كەوایە، دوژمنی دڵ پڕ لە قین، بۆ بەچۆكداهێنانی خەباتی ڕەوای كورد‌، هەمیشە سیاسەتێكی هەڵە و وێرانكاری گرتۆتەبەر، لە رێگای بەكردەیی كردنی ئەو سیاسەتەدا، زۆر جینایەتی خوڵقاندوون ‌و دەخوڵقێنێ.
دوژمنانی خەڵكی كورد بە ئەنقەست، بە بێ ئاوردانەوە لە هۆكارەكانی سەرهەڵدانی خەڵكی كورد كە لە راستیدا بەرهەمی سیاسەت‌ و كرداری ئەوانە لە بەرانبەر خەڵكی كورد، هەموو كات هەولیان داوە بە پیلانگێڕی ‌و گرتنەبەری رێگای سەركوت‌، داپڵۆسین‌، كوشتار، وێرانكردن، سووتاندن‌، بەندكردن ‌و رەشەكوژی، بزووتنەوەی خەڵكی كورد بەچۆكدا بێنن. بۆ وەدیهێنانی خەونی نەزۆكی بەچۆكداهێنانی خەباتی ڕەوا و ئاشتیخوازانەی كورد، پشت بە یاسا و رێسا ‌و ئایینی خۆسازكەر دەبەستن ‌و بە ناڕەوا ویستوویانە و دەیانهەوێ، ڕەوایی بەم ناڕەواییانە ببەخشن بە بێ ئەوەی ئەم پەلەقاژەیان بۆ چووبێتەسەر، هەروا لێرە و لەوێ درێژەی دەدەن.
لە رەوتی نەپساوەی ئەم سیاسەتە شەڕئەنگێزانەدا، بۆ دەستبەركردنی سەرنەویكردن بە خەباتی سەربەرزانەی‌ پێشمەرگەدا بوو كە ڕۆژی 16ی سەرماوەزی ساڵی 1366ی هەتاوی، بەرانبەر بە 7ی دێسامبری 1987ی زایینی، پاش دەیان‌ و بگرە سەدان كرداری قیزەون ‌و دژەمرۆیی دژ بە خەباتگێرانی كورد، تیرۆریستە كاسەلێس ‌و بەكرێگیراوەكانی كۆماری ئیسلامی، پاش چەند هەوڵێكی بێ‌ئا‌كام كە پێشتر لە رێگای ناردنی پێڵاو ‌و كاتژمێری بۆمبڕێژكراو بۆ زەبروەشاندن لە فەرماندەری بەوەج ‌و كارامەی كوردستان، ڕۆڵەی ئازا و چاونەترسی نیشتمان، پێشمەرگەی بەجەرگ‌ و دوژمن بەزێن، هەڵۆی هەمیشە بەرزەفڕی دووندنشین، مامۆستای زانا و تێگەیشتووی پێشمەرگە، كاك مەلا حەسەن شیوەسەڵی، ئەندامی كۆمیتەی ناوەندی حیزبی دێموكراتی كوردستانی ئێران دابوویان، مخابن لە پیلانێكی جینایەتكارانەی سامناكدا، لە رێگای چەند خۆفرۆشێكەوە بە بۆمبرێژكردنی كتێبی «سفید دەندان» لە نووسینی «جەك لەندەن»، توانییان بە بەشێك لە مەرامە چەپەڵەكانیان بگەن‌ ‌‌و بەشێك لە جەستەی پیرۆزی لێبستێنن، بەڵام بیری شۆڕشگیڕانە ‌و خۆبەدەستەوەنەدەرانەی، هەرگیزا و هەرگیز.
لە راستیدا ئەگەر هێزی زۆر و زەوەند، پۆشتە و پڕچەكی دوژمن، لە دەیان شەڕی نابەرانبەردا كە بە سەر خەڵكی كوردستان ‌و بزووتنەوە پێشڕەوەكەیدا سەپاندبوویان، بە فرۆكەی بۆمبهاوێژ ‌و سەدان‌ و هەزاران بەسیجی، سپایی ‌و بەكرێگیراوی دژ بە ئازادی ‌و مافی نەتەوەیی، نەیانتوانیبوو زەفەر بە ڕەمز و قەڵای خۆڕاگری پێشمەرگە، بە شێری هەمیشە لە بێشەی نێو لێڕەواڕ و دارستانەكانی سەردەشتی سەرسەوز و دێموكراتپەروەر بەرن، ئەوا مخابن ‌و سەد داخ، كە لە رێگای تیرۆرەوە توانییان جەستە ‌و قەڵافەتی جوامێرانەی كاك حەسەن شیوەسەڵی زامدار و برینهەڵگر بكەن ‌و بەم ڕووداوەش ریسوایی هەتاهەتایی بۆ خوڵقێنەرانی ئەم تاوانە، داخ‌ و خەفەتی زۆر ‌و گران بۆ هاومەتەرێزەكانی ‌و خەڵكی خۆڕاگری كوردستان بێنە ئاراوە.
بەشێكی زۆر لەم خەفەتبارییە، لەو‌ سۆنگەوە سە‌رچاوە دەگرێ، ئەم كارە حەیاتكێنە لە رێگای چەند خۆفرۆشێكی بێ قەدر و قیمەتی كوردەوە، بە فیتی دامودەزگای دەوڵەتی قەوما، ئەوە لە حاڵێكدا بوو، دوژمن لە دەیان پەلامار و هێرشی ئاسمانی ‌‌و زەمینیدا، لە دەیان موشەكباران ‌و ئاگربارانی بێبەزەییانەدا، لە سەدان بۆسە و شەڕی قورسدا، نەیتوانیبوو زەفەر بەم هەڵۆ تیژباڵەی خەباتی ڕەوای خەڵكی كوردستان بەرێ ‌و لە غافڵگیركردنی دەستەوەستان بوو.
ئەگەر حەسەن شیوەسەڵی، چۆكی بۆ دوژمنانی ئازادی دادابا‌، سەری بێستوون ئاسا‌ و پڕ لە سەوداسەری ئازادیخوازی ‌و نەتەوەویستی، بۆ داگیركەری دڵ رەش نەوی كردبا، خۆ ساڵەكانی دەیەی 70ی زایینی، لە ئەشكەنجەگاكانی رێژیمی پاشایەتیدا‌ چۆكی دادەدا ‌و بیری لە خەبات بۆ ئازادی نەدەكردەوە و نرخەكەشی نەدەدا.
«عەبباس مەزاهێری» لە كتێبی «شكوفەهای پرپرشدە انار» (شكۆفە پەڕەپەڕەكراوەكانی هەنار)دا زۆر بە ڕوونی بەشێك لە ئازایەتی ‌و ورەبەرزی، چۆكدانەدانی مامۆستا حەسەن شیوەسەڵی لە گرتووخانەكانی رژیمی پاشایەتی لە شاری «زەنجان» باس دەكات ‌و بە پانەوە ڕۆڵی پێشەنگانە ‌و مامۆستایانە‌ی كاك حەسەن دێنێتە زمان‌ و بە شانازییەوە بە پاڵەوانێكی ڕۆژە دژوارەكانی دەناسێنێ ‌و رێز لە ئازایەتی ‌و زانایی ئە‌م رێبەرەی كورد لە ئاست دوژمنانی ئازادیدا دەگرێت.
ئەگەرچی لە ساڵی 1995ی زایینی، بەرانبەر بە 1374ی هەتاوی بەملاوە، مامۆستا شیوەسەڵی بە هۆی كاریگەریی ئەو تیرۆرەوە، بە لەدەستدانی بینایی ‌و دەستەكانی‌، لەسەر داخوازی هاوڕێیانی لە حیزبی دێموكراتی كوردستان، بەنابەدڵی لە وڵاتی سوئێد گیرساوەتەوە، لەگەڵ منداڵ ‌و هاوسەرە بەڕێز و فیداكارەكەی ژیان تێپەڕ دەكەن، بەڵام هەموو ئەوانەی لە نزیكەوە مامۆستا دەناسن باش دەزانن كە ناوبراو سەرەڕای هەموو ژان ‌و ئێشەكانی ڕۆژانەی كە بە هۆی ئەو تیرۆرەوە خزاوەتە جەستەی، دایمە بیر و هۆشی لای پێشمەرگەكانە و بە گرینگییەوە دەنگ ‌و باسی پێوەندیدار بە كورد ‌و كوردستان سەرنج دەداتێ ‌و دڵە ئۆقرەنەگرتووەكەی بۆ رزگاری ‌و هەڵمژینی هەوای بێگەردی كۆیستانەكانی وڵات، وەكوو هەمیشە بەخیرایی لێدەدات، ئەو بە ڕینوێنی‌‌ بیرتیژانە هاندەری لاوان بۆ خەباتی ڕەوایە، كاك حەسەن ئێستایش بەو هیواوە هەناسە دەدات بەڵكوو وەكوو جاری جاران خۆی لە بەردەم كوانووی داپیرەی كورددا ببینێتەوە و بە بزە پڕ لە مێهرەبانییەكانی هیوای سبەینێكی خۆشیان بداتێ ‌و ئارەقەی سەر تەوێڵی ماندووی جووتیار و وەرزێڕی كورد لابدات‌، لە لای رەزەوانەكانی سەردەشتی مەلا ئاوارە، پشوویەك بدات‌، ڕیگای ئەمن ‌و‌ ئەمان بۆ كاروانچییە ماندووەكان دەستنیشان بكات، پاشان بۆ خەڵكی دەڤەرەكە تاوێك لە سیاسەت‌ بدوێت‌، كەمێك داستانی نەبەردی ‌و نەبەزی بگێڕێتەوە.
ئاخر، ئەم ڕۆڵە چاونەترسەی دێموكرات، بە كرداری چاك، بە گوفتاری شیرین، بە داوێن پاكی ‌و لەفزشیرینی،‌ بۆ هەمیشە بۆتە خۆشەویستی خەڵكی كوردستان بە گشتی‌ و ناوچە‌ی موكریان بە تایبەتی. ئەو هەڵسوكەوتە شۆڕشگێڕانەی كە قاسملووی رێبەر نرخی بۆ دادەنا و رێزی لێدەگرت‌ ‌‌و پاشان دوكتۆر شەرەفكە‌ندی بە هەمان ئاقاردا ئەسپی ئەمەگداری لەم سیمبولەی خەباتی ڕەوای دێموكرات ‌و گەلی كورد، تاو دەدا.
تاكوو ئاهەنگی تاڤگەی دڵڕفێنی شەڵماش، ئاوپرژێنی دڵی ئەویندارانی جوانی ‌و شادی بكات، تاكوو كەڵوێ لە هاژە هاژ و كەفوكۆڵدا بێ، تاكوو چیای گیاڕەنگ بەپێوە بێ، گومانی تێدا نیە، حەسەن شیوەسەڵی بەڵگەیەكی زیندووی تیرۆریزمی دەوڵەتی كۆماری ئیسلامی‌ و شانازی خەباتی ڕەوای خەڵكی كورد بۆ ئازادی، دێموكراسی ‌و ئاشتییە.
هەرچەند تاكوو هەنووكە لەم جینایەتە هەژێنەرە، وەكوو پێویست بۆ لەقاودانی روخسار و ناوەرۆكی تیرۆریستانەی رێژیمی ئێران، دژی خەڵكی كوردستان كەڵك وەرنەگیراوە، چوونكە سیمای پێشمەرگانەی ئەگەر لە لایەك دەربڕی ورەی بەرزی پێشمەرگەیە لە لایەكی دیكەوە لەقاودەری ئەو جۆرە پیلان و جینایەتانەیە كە رێژیم دەرحەق بە پێشمەرگە و خەڵكی كوردستان ئەنجامی داون.
سڵاو لە یاد و ناوی هەموو ئەوانەی كە ئێستاش ناوەكە‌یان بۆ دوژمن سامخوڵقێن ‌و بۆ نیشتمانپەروەران هیوادەر و پشت و پەنایە.